* धमतरी(कंडेल) के छात्रा कुसुमलता ल मिलिस प्रदेश टॉप-5 म जगह, जिला म खुशी के लहर 12वीं म 97.40% लेके करिन प्रदेश म पाँचवां स्थान प्राप्त…
* जिला पंचायत सभापति श्रीमती मोनिका देवांगन ह छात्रा के निवास घर पहुंच के ओकर शानदार सफलता बर दीस बधाई अऊ शुभकामना…
कंडेल/धमतरी : धमतरी जिला बर एक बड़े गौरव के बात सामने आय हवय। स्वामी आत्मानंद हायर सेकेंडरी स्कूल कंडेल के होनहार छात्रा कुमारी कुसुमलता विपरे ह 12वीं बोर्ड परीक्षा म 97.40 प्रतिशत अंक हासिल करके पूरा प्रदेश म पाँचवां स्थान हासिल करिस हवय। ए शानदार उपलब्धि ले जिला धमतरी के नाम रोशन होइस हे अऊ पूरा इलाका म खुशी के माहौल बन गे हवय।
बतादेन के कुसुमलता विपरे, जे ह मूल रूप ले गरियाबंद जिला के रहइया आय, वो ह अपन नाना के घर गौरव ग्राम कंडेल म रहिके पढ़ई करत-करत ए सफलता हासिल करिस हवय। सीमित संसाधन के बावजूद घलो वो ह अपन कड़ी मेहनत, लगन अऊ दृढ़ संकल्प ले साबित कर दिस के कठिन परिस्थिति घलो सफलता के रद्दा म रुकावट नई बन सकय।
जिला पंचायत सभापति श्रीमती मोनिका देवांगन ह छात्रा के निवास पहुंच के ओकर शानदार सफलता बर बधाई अऊ शुभकामना दीस। ओमन छात्रा के सम्मान करत ओकर उज्ज्वल भविष्य बर शुभेच्छा जताइन।
श्रीमती देवांगन ह कहिन के कुसुमलता के ए सफलता जिला भर के विद्यार्थी मन बर प्रेरणा के स्रोत आय। ओमन कहिन के निरंतर मेहनत, अनुशासन अऊ दृढ़ संकल्प लेच ए किसिम के उपलब्धि हासिल होथे। आज बेटियाँ पढ़ई-लिखई के क्षेत्र म नवा-नवा कीर्तिमान बनावत समाज के गौरवान्वित करत हवंय।
ओमन छात्रा के अभिभावक अऊ गुरुजन मन के घलो बधाई दिहिन अऊ कहिन के ओमन के मार्गदर्शन अऊ सहयोग लेच ए सफलता संभव हो पाइस हवय।
ए अवसर म भाजपा मंडल भोथली के अध्यक्ष मिश्रीलाल पटेल, जिला मंत्री हेमंत चंद्राकर, पूर्व गंगरेल मंडल अध्यक्ष ऋषभ देवांगन, वरिष्ठ कार्यकर्ता यतीश भूषण श्रीवास्तव सहित अनेकों जनप्रतिनिधि, स्कूल के प्राचार्य, शिक्षक, परिवारजन अऊ स्थानीय नागरिक मन उपस्थित रहिन अऊ छात्रा के उज्ज्वल भविष्य बर शुभकामना दीन।
