* जोहार छत्तीसगढ़ पार्टी ह SDM ला सौंपिस जनसमस्या मन के ज्ञापन…
* अवैध रेत उत्खनन अउ नो-एंट्री उल्लंघन अउ छत्तीसगढ़ महतारी मूर्ति के दुर्दशा ऊपर फूटिस जनआक्रोश, प्रशासन ला घेरिस जोहार छत्तीसगढ़ पार्टी…
* 15 दिन म कार्रवाई नई होय त उग्र आंदोलन अउ चक्काजाम के दिस चेतावनी…
पाटन : जोहार छत्तीसगढ़ पार्टी के जिला अध्यक्ष मधुकांत साहू सहित पार्टी के कार्यकर्ता मन ह पाटन के अनुविभागीय दंडाधिकारी कार्यालय पहुंचके क्षेत्र के विभिन्न जनसमस्या मन के निराकरण बर ज्ञापन सौंपिन। ज्ञापन म 15 दिन के भीतर कार्रवाई नई होय के स्थिति म उग्र आंदोलन अउ चक्काजाम करे के चेतावनी दे गे हे।
पाटन पुलिस करे बाहरी मनखे मन के पतासाजी’
पार्टी कार्यकर्ता मन ह कहिन कि पाटन नगर म पिछला पांच साल ले बाहिर ले आय मनखे मन के संख्या तेजी ले बढ़े हे, फेर कई झिन मनखे मन के थाना म मुसाफिरी दर्ज नई होय हे। एला सुरक्षा बर खतरा बतावत बाहरी मनखे मन के सघन जांच अउ सत्यापन करे के मांग करे गे हे।
पाटन शहर अंदर भारी वाहनों पर नो-एंट्री:
ज्ञापन म नो-एंट्री के बावजूद आत्मानंद चौक ले महामाया मंदिर चौक होते सुआ चौक तक भारी मालवाहक वाहन मन के आवाजाही उपर घलो चिंता जताय गे हे। पार्टी के कहना हे कि भारी वाहन मन के कारण आम जनता के जान जोखिम म परत हे, एखर ऊपर तत्काल रोक लगाय जाय।
छत्तीसगढ़ महतारी मूर्ति के खराब स्थिति:
कार्यकर्ता मन ह एसडीएम कार्यालय आगू स्थापित छत्तीसगढ़ महतारी मूर्ति के खराब स्थिति उपर घलो नाराजगी जाहिर करिन। ओमन कहिन कि मूर्ति के साफ-सफाई, मरम्मत अउ बंद पड़े फौहारा के सुधार जरूरी हे। संगही महतारी अंगना म पोस्टर-बैनर लगाके प्रचार करे ला आस्था के अपमान बताइस।
तरीघाट के नवा विश्राम गृह म स्टाफ के कमी:
ज्ञापन म ग्राम तरीघाट के नवा विश्राम गृह म स्टाफ के कमी के मुद्दा उठावत तत्काल कर्मचारी नियुक्ति अउ जरूरी सुविधा उपलब्ध कराय के मांग करे गे। एखर अलावा ग्राम खुड़मुड़ी म अवैध रेत उत्खनन ऊपर कार्रवाई नई होय के आरोप लगावत प्रशासन ऊपर संरक्षण देय के संदेह जताय गे हे।
जोहार छत्तीसगढ़ पार्टी ह चेतावनी दीस हे कि 15 दिन के भीतर ठोस कार्रवाई नई होय त जिला स्तरीय आंदोलन अउ चक्काजाम करे जाही, जेन के जिम्मेदारी शासन-प्रशासन के होही।
