छत्तीसगढ़िया क्रांति सेना मनाही काली “पाटन” म जबर “आठे तिहार”; छत्तीसगढ़ के नानम झलक नंदावत संस्कृति अउ पारंपरिक कला-कौशल ल देखाय जाही झलक…
पाटन/संतोष देवांगन-छत्तीसगढ़ियां ; पाटन म छत्तीसगढ़िया क्रांति सेना दु बछर ले जबर हरेली के बाद एसो जबर “आठे तिहार” ल बड़े धूमधाम ले मनावत हे। ए कार्यक्रम बर जम्मो समाज, संगठन, व्यवसायी, शासकीय-अशासकीय कर्मचारी, अधिकारी, शिक्षा संस्थान, हॉस्पिटल, पत्रकार, कलाकार, साहित्यकार, अउ हमर संग खड़े होइया दाई-बहिनी-भइया मन ल नेवता पाती भेजे गेहे।
ए दारी पाटन के “आठे तिहार” ल छत्तीसगढ़िया संस्कृति के पहचान अउ एकता के प्रतीक बताए गिस। अऊ कल बिहिनिया 10:30 बजे अखरा दाई मंदिर प्रांगण ले पूजा-पाठ करके रैली के सुरुआत होही। रैली कॉलेज रोड, जगन्नाथ मंदिर, अउ पाटन के मुख्य मार्ग मन ले होके निकलही ।
अऊ रैली के समापन 3 बजे नवा बस टेशन, राधा रानी मंदिर गौठान पाटन म होही। ए ठउर कार्यक्रम मंचीय आयोजन के रूप म होही जिहां छत्तीसगढ़ के नानम झलक नंदावत संस्कृति अउ पारंपरिक कला-कौशल ल देखाय जाही। साथ ही विभिन्न छत्तीसगढ़ी कलाकार मन के आगमन घलो होही जेन अपन प्रस्तुति देही।