सुरता: लोक सुर के भागीरथी खुमानसाव गुरुजी
जन्म – 5 सितम्बर 1929 देहावसान – 09 जून 2019
1 गुरुजी खुमान ले गुमान सब ला,
साव चेत ले संगीत सिरजाय।
मंदराजी रवेली के पेटी बजाये,
आर्केस्टा ले चंदैनी गोंदा मा छाय।।
2.दुरुग के खुर्सीटिकुल गांव मे,
टीकम साव के खेती हरियाय।
पांच सितंबर 1929 ,
खुशी ले खुमान बेटा पाय।।
3.डहर चलती गाड़ा बाजा बजाये,
पीपर पान मा संगीत सुनाय।
खेत खार मा करमा ददरिया ,
गाड़ा बइला मा धुन बनाय।।
4.भाई मंदराजी हारमोनियम लाये,
पहली बाजा के मजा पाय।
रवेली नाचा संगे जावे,
पढ़ई बर नांदगांव मा नाम लिखाय।।
5.बारह साल मा संगीत शिक्छा,
रामसुमरन दास भुनेश्वर ले पाय।
हाई स्कूल मा सियाराम दास मिले,
संगीत के सब स्वर गुरू बताय।।
6.खड़े साज मा लिटिया मा भईया,
हारमोनियम पटका कांधा लटकाय।
रात भर गाये बजाये खुमान जी,
मालगुजार जनता ले आसीस पाय।।
7.मुनिस्पल मा मास्टर बने,
स्नेह सम्मेलन मा देखनी रहाय।
दस बार भोपाल मा लइका संगे,
सांस्कृतिक प्रस्तुति ले पहला आय।।
8.जगेसर दास के लोक कला आउ,
भवर सिंह देवांगन के चेला रहाय।
हीरालाल लाल गौतम पेंटर मिले,
रामरतन सारथी तबला बजाय।।
9.भारतीय संगीत सीखे संगे ,
फिल्मी गाना के सौक रहाय।
सरस्वती आर्केस्टा बनाऐ ,
शारदा आर्केस्टा मा बने सहाय।।
10. नाम्ही राजभारती ऑर्केस्ट्रा,
शहर मा संगीत सुने बर बुलाय।
मदराजी के खेली पार्टी मा,
लोक गंगा के धारा बोहाय I।
11.राम चन्द्र देशमुख के बुलौवा,
संगीत कार बनो सिरजन हो जाय।
करजा छूटना हे छत्तीसगढ़ ke,
बिन साधक के अधूरा बताय।।
12.सिरजन बर तपसी के आना,
घर परिवार ला रहे बिसार।
छत्तीसगढ़ हा बिधुन होवे,
गियानी धियानी बर होवे जोहार।।
13.पूजा ले फूल चंदैनी गोंदा,
खेती किसानी तिहार रहे दिखाय।
पहिली दरसन सन् सत्तर् मा,
आकाशवाणी मा रिकार्डिंग हो जाय।।
14.लक्षमण मस्तुरिया आये ले बने,
भैयालाल शिवकुमार अभिनय दिखाय।
तिरसठ कलाकार के रचना निभाये,
दिल्ली दूरदर्शन मा दुनिया छाय।।
15.सौ पारी मा रामचंद्र देशमुख छोड़े,
खुमान साव के अटल फैसला सुनांव।
धरती के सेवा बर सदा बजाहूं
ठेकवा गांव चंदैनी गोंदा के ठाव
16.भेलई के लोककला महोत्सव मा,
मंदराजी पुरस्कार मा आँसू बोहाय।
छत्तीसगढ़ जगवारी गीत गाये,
किसानी घाट घटोंदा राग मिलाय।।
17.दिल्ली मा संगीत कला अकादमी,
महामहिम रास्ट्रपति मान देवाय।
छत्तीसगढ़ मा मंदराजी चिनहारी,
नवा कलाकार दु लाख देवाय।।
18. नवासी साल मा शिक्षक दिवस ,
पुराना कलाकार संगी सकलाय।
नौ जून मंझनिया संगीत बजाये,
गुरु के विदाई में नमन हो जाय।।